אגרת שאול אל הקולוסים
פרק ג

חיים חדשים באיחוד עם המשיח -- המשך

1 לָכֵן אִם-קַמְתֶּם עִם-הַמָּשִׁיחַ בַּקְּשׁוּ אֵת אֲשֶׁר לְמָעְלָה אֲשֶׁר הַמָּשִׁיחַ ישֵׁב שָׁם לִימִין הָאֱלֹהִים׃(תהילים קי' א') 2 אֵת אֲשֶׁר לְמַעְלָה יֶהְגֶּה לְבַבְכֶם לֹא אֶת-אֲשֶׁר בָּאָרֶץ׃ 3 כִּי-מַתֶּם וְחַיֵּיכֶם צְפוּנִים עִם-הַמָּשִׁיחַ בֵּאלֹהִים׃ 4 בְּעֵת הִגָּלוֹת הַמָּשִׁיחַ אֲשֶׁר הוּא חַיֵּיכֶם גַּם-אַתֶּם תִּגָּלוּ עִמּוֹ בְּכָבוֹד׃ 5 עַל-כֵּן תְּמוֹתֲתוּ אֵבָרֵיכֶם בָּאָרֶץ אֶת-הַזְּנוּת וְהַטֻּמְאָה וְהַזִּמָּה וְהַתַּאֲוֹת הָרָעוֹת וּנְטוֹת אַחֲרֵי הַבֶּצַע אֲשֶׁר הִיא עֲבוֹדַת אֱלִילִים׃ 6 כִּי בִּגְלַל אֵלֶּה יָבֹא חֲרוֹן אֱלֹהִים עַל-בְּנֵי הַמֶּרִי׃ 7 אֲשֶׁר גַּם-אַתֶּם הֲלַכְתֶּם בָּהֶם מִלְּפָנִים בְּשִׁבְתְּכֶם בְּתוֹכָם׃ 8 אַךְ-עַתָּה הָסִירוּ כָּל-אֵלֶּה מֵעֲלֵיכֶם רֹגֶז וָכַעַס וְרֶשַׁע וְגִדּוּף וְדִבְרֵי נְבָלָה מִפִּיכֶם׃ 9 וְאַל-תְּשַׁקְּרוּ אִישׁ בַּעֲמִיתוֹ אַחֲרֵי אֲשֶׁר פְּשַׁטְתֶּם אֶת-הָאָדָם הַיָּשָׁן וּפְעֻלּוֹתָיו׃(ויקרא יט' יא') 10 וּלְבַשְׁתֶּם אֶת-הָאָדָם הֶחָדָשׁ הַמִּתְחַדֵּשׁ בַּדַּעַת כְּצֶלֶם בֹּרְאוֹ׃(בראשית א' כז') 11 אֲשֶׁר אֵין-בּוֹ יְוָנִי וִיהוּדִי וְלֹא מִילָה וְעָרְלָה וְלֹא לֹעֵז וּסְקוּתִי וְלֹא עֶבֶד וּבֶן-חוֹרִין כִּי הַמָּשִׁיחַ הוּא הַכֹּל וּבַכֹּל׃ 12 לָכֵן אַתֶּם בְּחִירֵי הָאֱלֹהִים הַקְּדשִׁים וְהַחֲבִיבִים לִבְשׁוּ הֲמוֹן רַחֲמִים וּנְדִיבוּת וּנְמִיכוּת רוּחַ וַעֲנָוָה וְאֶרֶך אַפָּיִם׃ 13 וְתִשְׂאוּ אִישׁ אֶת-רֵעֵהוּ וְתִמְחֲלוּ בִּהְיוֹת לָכֶם רִיב אִישׁ עִם-אָחִיו כַּאֲשֶׁר הַמָּשִׁיחַ מָחַל לָכֶם כֵּן תִּמְחֲלוּ גַּם-אַתֶּם׃ 14 וְעַל-כָּל-אֵלֶּה לִבְשׁוּ הָאַהֲבָה הִיא אֲגֻדַּת הַשְּׁלֵמוּת׃ 15 וְיִשְׁלַט בִּלְבַבְכֶם שְׁלוֹם [הַמָּשִׁיחַ] אֲשֶׁר-נִקְרֵאתֶם לוֹ בְּגוּף אֶחָד וְזִבְחוּ תּוֹדָה׃ 16 דְּבַר הַמָּשִׁיחַ יִשְׁכֹּן בְּקִרְבְּכֶם בְּשֶׁפַע רַב בְּכָל-חָכְמָה וּתְלַמְּדוּ וּתְעוֹרֲרוּ אֶת-נַפְשְׁכֶם בִּתְהִלּוֹת וְתִשְׁבָּחוֹת וְשִׁירוֹת רוּחָנִיּוֹת וְשִׁירוּ לַיהוָֹה בִּנְעִימָה בִּלְבַבְכֶם׃(תהילים ל' ה'; לד' ב') 17 וְכֹל אֲשֶׁר-תַּעֲשׂוּ בֵּין בְּמִלִּין וּבֵין בְּפֹעַל עֲשׂוּ בְּשֵׁם הָאָדוֹן יֵשׁוּעַ וְהוֹדוּ לֵאלֹהִים אָבִינוּ עַל-יָדוֹ׃

יחסים בין בני אדם בחיים החדשים

18 אַתֶּן הַנָּשִׁים הִכָּנַעְנָה לְבַעֲלֵיכֶן כָּרָאוּי בַּאֲדֹנֵינוּ׃ 19 אַתֶּם הָאֲנָשִׁים אֶהֱבוּ אֶת-נְשֵׁיכֶם וְאַל-תִּתְמַרְמְרוּ אֲלֵיהֶן׃ 20 הַבָּנִים שִׁמְעוּ אֶל-יֹלְדֵיכֶם בְּכָל-דָּבָר (משלי ו' כ') כִּי-הוּא לְרָצוֹן לַאֲדֹנֵינוּ׃ 21 הָאָבוֹת אַל-תַּרְגִּיזוּ אֶת-בְּנֵיכֶם פֶּן-יִתְיָאָשׁוּ׃ 22 הָעֲבָדִים שִׁמְעוּ אֶל-אֲדֹנֵיכֶם מִן-הַבָּשָׂר לְכָל-דָּבָר לֹא בַעֲבוֹדָה שֶׁהִיא לְמַרְאֵה עֵינַיִם כִּמְבַקְשִׁים לִמְצֹא חֵן בְּעֵינֵי בְּנֵי-אָדָם כִּי אִם-בְּתָם-לֵבָב כְּיִרְאֵי הָאֱלֹהִים׃ 23 כָּל-אֲשֶׁר תַּעֲשׂוּ עֲשׂוּ בְּכָל-נַפְשְׁכֶם כְּמִי שֶׁעֹשֶׂה לַיהוָֹה וְלֹא לִבְנֵי-אָדָם׃ 24 וִידַעְתֶּם כִּי תִקְחוּ מֵאֵת יְהוָֹה גְּמוּל הַיְרֻשָּׁה כִּי אֶת-אֲדֹנֵינוּ הַמָּשִׁיחַ עֹבְדִים אַתֶּם׃ 25 וְכָל-עֹשֶׂה עָוֶל הוּא יִשָׂא הָעָוֶל אֲשֶׁר עָשָׂה וְאֵין-שָׁם מַשּׂא פָנִים׃(דברי הימים ב', יט' ז')