הבשורה על-פי יוחנן
פרק ט

ריפוי עיוור מלידה

1 וַיְהִי בְּעָבְרוֹ וַיַּרְא אִישׁ וְהוּא עִוֵּר מִיּוֹם הִוָּלְדוֹ׃ 2 וַיִּשְׁאֲלוּ אֹתוֹ תַּלְמִידָיו לֵאמֹר רַבִּי מִי הַחֹטֶא הוּא אוֹ יֹלְדָיו כִּי נוֹלַד עִוֵּר׃(שמות כ' ד') 3 וַיַּעַן יֵשׁוּעַ לֹא הוּא חָטָא וְלֹא יוֹלְדָיו אַךְ לְמַעַן יִגָּלוּ-בוֹ מַעַלְלֵי-אֵל׃ 4 עָלַי לַעֲשׂוֹת מַעֲשֵׂי שֹׁלְחִי בְּעוֹד יוֹם יָבוֹא הַלַּיְלָה אֲשֶׁר-בּוֹ לֹא-יָכֹל אִישׁ לַעֲשׂוֹת׃ 5 בְּעוֹדֶנִּי בָּעוֹלָם אוֹר הָעוֹלָם אָנִי׃(ישעיהו מב' ו'; מט' ו') 6 וַיְהִי כְּדַבְּרוֹ זֹאת וַיָּרָק עַל-הָאָרֶץ וַיַּעַשׂ טִיט מִן-הָרוֹק וַיִּמְרַח אֶת-הַטִּיט עַל-עֵינֵי הָעִוֵּר׃ 7 וַיֹּאמֶר אֵלָיו לֵךְ וּרְחַץ בִּבְרֵכַת הַשִּׁלֹחַ הוּא שָׁלוּחַ וַיֵּלֶךְ וַיִּרְחַץ וַיָּבֹא וְעֵינָיו רֹאוֹת׃(תהילים קמו' ח'; ישעיהו לה' ה') 8 וַיֹּאמְרוּ שְׁכֵנָיו וַאֲשֶׁר רָאוּ אֹתוֹ לְפָנִים כִּי-עִוֵּר הוּא הֲלֹא הוּא הַיּשֵׁב וְשֹׁאֵל צְדָקָה׃ 9 אֵלֶּה אָמְרוּ כִּי-זֶה הוּא וְאֵלֶּה אָמְרוּ אַךְ-דּוֹמֶה לּוֹ וְהוּא אָמַר אֲנִי הוּא׃ 10 וַיֹּאמְרוּ אֵלָיו וְאֵיךְ נִפְקְחוּ עֵינֶיךָ׃ 11 וַיַּעַן וַיֹאמֶר אִישׁ אֲשֶׁר-נִקְרָא שְׁמוֹ יֵשׁוּעַ עָשָׂה טִיט וַיִּמְרַח עַל-עֵינַי וַיֹּאמֶר אֵלַי לֵךְ וּרְחַץ בִּבְרֵכַת הַשִּׁלֹחַ וָאֵלֵךְ וָאֶרְחַץ וַתִּפָּקַחְנָה עֵינָי׃ 12 וַיֹּאמְרוּ אֵלָיו וְאַיּוֹ וַיֹּאמֶר לֹא יָדָעְתִּי׃ 13 וַיָּבִיאוּ אֶת-הָאִישׁ אֲשֶׁר הָיָה עִוֵּר לְפָנִים אֶל-הַפְּרוּשִׁים׃ 14 וְהַיּוֹם אֲשֶׁר עָשָׂה-בוֹ יֵשׁוּעַ אֶת-הַטִּיט וַיִּפְקַח אֶת-עֵינָיו הָיָה יוֹם הַשַּׁבָּת׃ 15 וַיּוֹסִיפוּ לִשְׁאֹל אֹתוֹ גַּם-הַפְּרוּשִׁים אֵיךְ נִפְקְחוּ עֵינָיו וַיֹּאמֶר אֲלֵיהֶם טִיט שָׂם עַל-עֵינַי וָאֶרְחַץ וְהִנְנִי רֹאֶה׃ 16 וַיֹּאמְרוּ מִקְצָת הַפְּרוּשִׁים זֶה הָאִישׁ לֹא מֵאֵת אֱלֹהִים הוּא כִּי לֹא-יִשְׁמֹר אֶת-הַשַּׁבָּת וַאֲחֵרִים אָמְרוּ אֵיכָה יוּכַל אִישׁ חֹטֵא לַעֲשׂוֹת אֹתוֹת כָּאֵלֶּה וַתְּהִי-מַחֲלֹקֶת בֵּינֵיהֶם׃(תהילים סו' יח') 17 וַיּוֹסִיפוּ וַיֹּאמְרוּ אֶל-הָעִוֵּר וְאַתָּה מַה-תֹּאמַר לוֹ כִּי פָקַח עֵינֶיךָ וַיֹּאמֶר נָבִיא הוּא׃ 18 וְלֹא-הֶאֱמִינוּ הַיְּהוּדִים כִּי עִוֵּר הָיָה וְאֹרוּ עֵינָיו עַד-אֲשֶׁר קָרְאוּ אֶל-יוֹלְדֵי הַנִּרְפָּא׃ 19 וַיִּשְׁאֲלוּ אֹתָם לֵאמֹר הֲזֶה בִנְכֶם אֲשֶׁר אֲמַרְתֶּם נוֹלַד עִוֵּר וְאֵיכָה הוּא רֹאֶה עָתָּה׃ 20 וַיַּעֲנוּ אֹתָם יוֹלְדָיו וַיֹּאמְרוּ יָדַעְנוּ כִּי זֶה הוּא בְּנֵנוּ וְכִי נוֹלַד עִוֵּר׃ 21 אֲבָל לֹא יָדַעְנוּ אֵיךְ הוּא רֹאֶה עַתָּה וְלֹא יָדַעְנוּ מִי פָקַח אֶת-עֵינָיו הֲלֹא בֶן-דַּעַת הוּא שַׁאֲלוּ אֶת-פִּיהוּ וְהוּא יַגִּיד מֶה-הָיָה לוֹ׃ 22 כָּזֹאת דִבְּרוּ יוֹלְדָיו מִיִּרְאָתָם אֶת-הַיְּהוּדִים כִּי הַיְּהוּדִים כְּבָר נוֹעֲצוּ לְנַדּוֹת אֶת-כָּל-אֲשֶׁר יוֹדֶה כִּי הוּא הַמָּשִׁיחַ׃ 23 עַל-כֵּן אָמְרוּ יוֹלְדָיו בֶּן-דַּעַת הוּא שַׁאֲלוּ אֶת-פִּיהוּ׃ 24 וַיִּקְרְאוּ שֵׁנִית לָאִישׁ אֲשֶׁר הָיָה עִוֵּר וַיֹּאמְרוּ אֵלָיו תֵּן כָּבוֹד לֵאלֹהִים אֲנַחְנוּ יָדַעְנוּ כִּי-הָאִישׁ הַזֶּה חֹטֵא הוּא׃(ישעיהו ז' יט') 25 וַיַּעַן וַיֹּאמַר אִם-חֹטֵא הָאִישׁ לֹא יָדָעְתִּי אַחַת יָדַעְתִּי כִּי עִוֵּר הָיִיתִי וְעַתָּה הִנְנִי רֹאֶה׃ 26 וַיֹּאמְרוּ אֵלָיו עוֹד מֶה-עָשָׂה לָךְ אֵיךְ פָּקַח עֵינֶיךָ׃ 27 וַיַּעַן אֹתָם כְּבָר אָמַרְתִּי לָכֶם הֲלֹא שְׁמַעְתֶּם וּמַה-לָכֶם לִשְׁמֹעַ שֵׁנִית הֲתַחְפְּצוּ גַם-אַתֶּם לִהְיוֹת תַּלְמִידָיו׃ 28 וַיְחָרֲפוּ אֹתוֹ וַיֹּאמְרוּ אַתָּה תַלְמִידוֹ וַאֲנַחְנוּ תַּלְמִידָיו שֶׁל-משֶׁה׃ 29 אֲנַחְנוּ יוֹדְעִים כִּי אֶל-משֶׁה דִבֶּר הָאֱלֹהִים וְאֶת-זֶה לֹא יָדַעְנוּ מֵאַיִן הוּא׃ 30 וַיַּעַן הָאִישׁ וַיֹּאמֶר אֲלֵיהֶם דָּבָר נִפְלָא הוּא אֲשֶׁר אַתֶּם לֹא יְדַעְתֶּם מֵאַיִן הוּא וְהוּא פָקַח אֶת-עֵינָי׃(ישעיהו מב' ז') 31 וְהִנֵּה יָדַעְנוּ כִּי אֶת-הַחַטָּאִים לֹא-יִשְׁמַע (***) אֵל כִּי אִם-אֶת-יְרֵא אֱלֹהִים וְעֹשֵׂה רְצוֹנוֹ אֹתוֹ יִשְׁמָע׃(תהילים קמה' יט'; משלי טו' כט') 32 מֵעוֹלָם לֹא נִשְׁמָע אֲשֶׁר-פָּקַח אִישׁ עֵינֵי עִוֵּר מֵרָחֶם׃(***) 33 לוּלֵא הָיָה זֶה מֵאֵת אֱלֹהִים לֹא הָיָה יָכֹל לַעֲשׂוֹת מְאוּמָה׃ 34 וַיַּעֲנוּ וַיֹּאמְרוּ אֵלָיו הֵן בַּחֲטָאִים נוֹלַדְתָּ כֻלָּךְ וְאַתָּה תְלַמְּדֵנוּ וַיֶּהְדְּפֻהוּ הַחוּצָה׃ 35 וַיִּשְׁמַע יֵשׁוּעַ כִּי הֲדָפֻהוּ הַחוּצָה וַיִּפְגְּשֵׁהוּ וַיֹּאמֶר אֵלָיו הֲתַאֲמִין בְּבֶן-הָאָדָם׃ 36 וַיַּעַן וַיֹּאמַר מִי הוּא-זֶה אֲדֹנִי וְאַאֲמִין בּוֹ׃ 37 וַיֹּאמֶר אֵלָיו יֵשׁוּעַ הֵן-רָאִיתָ אֹתוֹ וְהַמְדַבֵּר אֵלֶיךָ הִנֵּה זֶה הוּא׃ 38 וַיֹּאמֶר אֲנִי מַאֲמִין אֲדֹנִי וַיִּשְׁתַּחוּ לוֹ׃ 39 וַיֹּאמֶר יֵשׁוּעַ אֲנִי בָאתִי לָעוֹלָם הַזֶּה לָדִין לְמַעַן יִרְאוּ הַעִוְרִים וְהָרֹאִים יִהְיוּ לְעִוְרִים׃ 40 וַאֲשֶׁר הָיוּ עִמּוֹ מִן-הַפְּרוּשִׁים שָׁמְעוּ דְבָרָיו וַיֹּאמְרוּ אֵלָיו הֲַגַם אֲנַחְנוּ עִוְרִים׃ 41 וַיֹּאמֶר אֲלֵיהֶם לוּ הֱיִיתֶם עִוְרִים לֹא-הָיָה בָכֶם חֵטְא וְעַתָּה אֲמַרְתֶּם פִּקְחִים אֲנַחְנוּ וְתַעֲמֹד חַטַּאתְכֶם׃