הבשורה על-פי לוקס
פרק יא

כיצד להתפלל

(מתי ו' 15-5;ז' 11-7)

1 וַיְהִי הוּא מִתְפַּלֵּל בְּמָקוֹם אֶחָד וּכְכַלּתוֹ וַיֹּאמֶר אֵלָיו אֶחָד מִתַּלְמִידָיו אֲדֹנִי לַמְּדֵנוּ לְהִתְפַּלֵּל כַּאֲשֶׁר לִמֵּד גַּם-יוֹחָנָן אֶת-תַּלְמִידָיו׃ 2 וַיֹּאמֶר אֲלֵיהֶם כִּי תִתְפַּלֲלוּ אִמְרוּ אָבִינוּ [שֶׁבַּשָּׁמַיִם] יִתְקַדַּשׁ שְׁמֶךָ (יחזקאל לו' כג') תָּבוֹא מַלְכוּתֶךָ (ישעיהו נב' ז') [יֵעָשֶׂה רְצוֹנְךָ כְּמוֹ בַשָּׁמַיִם כֵּן בָּאָרֶץ]׃ 3 אֶת-לֶחֶם חֻקֵּנוּ תֶּן-לָנוּ יוֹם יוֹם׃(משלי ל' ח') 4 וּמְחַל-נָא עַל-חַטֹּאתֵנוּ כִּי מֹחְלִים גַּם-אֲנַחְנוּ לְכֹל הַחַיָּב לָנוּ וְאַל-תְּבִיאֵנוּ לִידֵי נִסָּיוֹן [כִּי אִם-הַצִּילֵנוּ מִן-הָרָע]׃ 5 וַיֹּאמֶר אֲלֵיהֶם מִי בָכֶם אֲשֶׁר-לוֹ אֹהֵב וְהָלַךְ וּבָא אֵלָיו בַּחֲצוֹת הַלַּיְלָה וְאָמַר אֵלָיו יְדִידִי הַלְוֵנִי שְׁלשֶׁת כִּכְּרוֹת-לָחֶם׃ 6 כִּי-אֹהֲבִי בָּא אֵלַי מִן-הַדָּרֶךְ וְלִי אֵין-כֹּל לָשׂוּם לְפָנָיו׃ 7 וְהוּא מִבַּיִת יַעֲנֶה וְיֹאמַר אַל-תּוֹגִיעֵנִי כִּי-כְבָר נִסְגְּרָה הַדֶּלֶת וִילָדַי שׁוֹכְבִים עִמָּדִי בַּמִּטָּה לֹא-אוּכַל לָקוּם וְלָתֶת לָךְ׃ 8 אֹמֵר אֲנִי לָכֶם גַּם כִּי לֹא-יָקוּם לָתֶת-לוֹ עַל-הֱיוֹתוֹ אֹהֲבוֹ יָקוּם בַּעֲבוּר עַזּוּת פָּנָיו וְיִתֶּן-לוֹ כְּכָל-צָרְכּוֹ׃ 9 וְגַם-אֲנִי אֹמֵר לָכֶם שַׁאֲלוּ וְיִנָּתֵן לָכֶם דִּרְשׁוּ וְתִמְצָאוּ דִּפְקוּ וְיִפָּתַח לָכֶם׃(תהילים לז' ד'; ירמיהו כט' יג') 10 כִּי כָּל-הַשֹּׁאֵל יְקַבֵּל וְהַדֹּרֵשׁ יִמְצָא וְהַדֹּפֵק יִפָּתַח-לוֹ׃(דברי הימים ב', לג' יג'; עזרא ח' כג') 11 וּמִי בָּכֶם הָאָב אֲשֶׁר יִשְׁאַל מִמֶּנּוּ בְּנוֹ לֶחֶם וְנָתַן-לוֹ אָבֶן וְאִם-דָּג הֲיִתֶּן-לוֹ נָחָשׁ תַּחַת הַדָּג׃ 12 אוֹ כִּי-יִשְׁאָלֶנּוּ בֵיצָה הֲיִתֶּן-לוֹ עַקְרָב׃ 13 הֵן-אַתֶּם הָרָעִים יֹדְעִים לָתֵת מַתָּנוֹת טֹבוֹת לִבְנֵיכֶם אַף-כִּי הָאָב מִן-הַשָּׁמַיִם יִתֵּן אֶת-רוּחַ הַקֹּדֶשׁ לַשֹּׁאֲלִים מֵאִתּוֹ׃(יואל ג' א'-ב')

ישוע נגד בעל-זבול

(מתי יב' 30-22;מרקוס ג' 27-20)

14 וַיְהִי הַיּוֹם וַיְגָרֶשׁ שֵׁד וְהוּא אִלֵּם וַיְהִי כַּאֲשֶׁר יָצָא הַשֵּׁד וַיְדַבֵּר הָאִלֵּם וַיִּתְמְהוּ הָעָם׃ 15 וְיֵשׁ מֵהֶם אֲשֶׁר אָמְרוּ בְּבַעַל-זְבוּל שַׂר הַשֵּׁדִים הוּא מְגָרֵשׁ אֶת-הַשֵּׁדִים׃(מלכים ב', א' ב') 16 וְיֵשׁ אֲשֶׁר נִסּוּהוּ וַיִּשְׁאֲלוּ מִמֶּנּוּ אוֹת מִן-הַשָּׁמָיִם׃ 17 וְהוּא יָדַע אֶת-מַחְשְׁבוֹתָם וַיֹּאמֶר אֲלֵיהֶם כָּל-מַמְלָכָה הַנֶּחֱלָקָה עַל-עַצְמָהּ תֵּחָרֵב וּבַיִת עַל-בַּיִת יִפֹּל׃ 18 וְגַם-הַשָּׂטָן אִם-נֶחֱלַק עַל-עַצְמוֹ אֵיכָכָה תִּכּוֹן מַמְלַכְתּוֹ כִּי אֲמַרְתֶּם שֶׁבְּבַעַל-זְבוּל מְגָרֵשׁ אֲנִי אֶת-הַשֵּׁדִים׃ 19 וְאִם-אֲנִי מְגָרֵשׁ אֶת-הַשֵּׁדִים בְּבַעַל-זְבוּל בְּנֵיכֶם בְּמִי הֵם מְגָרֲשִׁים אֹתָם עַל-כֵּן הֵמָּה יִהְיוּ שֹׁפְטֵיכֶם׃ 20 וְאִם-בְּאֶצְבַּע אֱלֹהִים מְגָרֵשׁ אֲנִי אֶת-הַשֵּׁדִים הִנֵּה הִגִּיעָה אֲלֵיכֶם מַלְכוּת הָאֱלֹהִים׃ 21 כְּשֶׁהַגִּבּוֹר שֹׁמֵר אֶת-חֲצֵרוֹ וְנִשְׁקוֹ עָלָיו שָׁלוֹם יִהְיֶה רְכוּשׁוֹ׃ 22 וְאִם-יָבוֹא עָלָיו חָזָק מִמֶּנּוּ וּתְקָפוֹ יִשָּׂא מִמֶּנּוּ אֶת-נִשְׁקוֹ אֲשֶׁר בָּטַח-בּוֹ וְאֶת-מַלְקֹחוֹ יְחַלֵּק׃ 23 כֹּל אֲשֶׁר אֵינֶנּוּ אִתִּי הוּא לְנֶגְדִּי וַאֲשֶׁר אֵינֶנּוּ מְכַנֵּס אִתִּי הוּא מְפַזֵּר׃

שיבת הרוח הטמאה

(מתי יב' 45-43)

24 הָרוּחַ הַטְּמֵאָה אַחֲרֵי צֵאתָהּ מִן-הָאָדָם תְּשׁוֹטֵט בִּמְקֹמוֹת צִיָּה לְבַקֶּשׁ-לָהּ מָנוֹחַ וְלֹא תִמְצָא אָז תֹּאמַר אָשׁוּבָה-נָּא אֶל-בֵּיתִי אֲשֶׁר יָצָאתִי מִשָּׁם׃ 25 וּבְבוֹאָהּ תִּמְצָא אֹתוֹ מְטֻאטָא וּמְהֻדָּר׃ 26 וְאַחַר תֵּלֵךְ וְלָקְחָה שֶׁבַע רוּחוֹת אֲחֵרוֹת רָעוֹת מִמֶּנָּה וּבָאוּ וְשָׁכְנוּ שָׁם וְהָיְתָה אַחֲרִית הָאָדָם הַהוּא רָעָה מֵרֵאשִׁיתוֹ׃

האושר האמתי

27 וַיְהִי כְּדַבְּרוֹ אֶת-הַדְּבָרִים הָאֵלֶּה וְאִשָּׁה אַחַת מִן-הָעָם נָשְׂאָה אֶת-קוֹלָהּ וַתֹּאמֶר אֵלָיו אַשְׁרֵי הַבֶּטֶן אֲשֶׁר נְשָׂאַתְךָ וְאַשְׁרֵי הַשָּׁדַיִם אֲשֶׁר יָנָקְתָּ׃ 28 וְהוּא אָמָר וְאַף כִּי-אַשְׁרֵי הַשֹּׁמְעִים וְהַשֹּׁמְרִים אֵת דְּבַר הָאֱלֹהִים׃(תהילים קיט' א'-ב')

הבקשה לראות אות

(מתי יב' 42-38;מרקוס ח' 12)

29 וּבְהִקָּבֵץ עַם-רָב וַיִּפְתַּח פִּיו וַיֹּאמַר הַדּוֹר הַזֶּה דּוֹר רָע הוּא (תהילים צה' י') אוֹת הוּא מְבַקֵּשׁ וְאוֹת לֹא יִנָּתֶן-לוֹ בִּלְתִּי אִם-אוֹת יוֹנָה [הַנָּבִיא]׃ 30 כִּי כַּאֲשֶׁר הָיָה יוֹנָה לְאַנְשֵׁי נִינְוֵה לְאוֹת (יונה ג' ג'-ה') כֵּן יִהְיֶה גַם-בֶּן-הָאָדָם לַדּוֹר הַזֶּה׃ 31 מַלְכַּת תֵּימָן (מלכים א', י' א'-י') תַּעֲמֹד לַמִּשְׁפָּט עִם-אַנְשֵׁי הַדּוֹר הַזֶּה וְהִרְשִׁיעָה אוֹתָם כִּי בָאָה מִקְצוֹת הָאָרֶץ לִשְׁמֹעַ אֶת-חָכְמַת שְׁלֹמֹה וְהִנֵּה יֶשׁ-פֹּה גָּדוֹל מִשְּׁלֹמֹה׃ 32 אַנְשֵׁי נִינְוֵה יַעַמְדוּ לַמִּשְׁפָּט עִם-הַדּוֹר הַזֶּה וְהִרְשִׁיעֻהוּ כִּי הֵם שָׁבוּ בִּקְרִיאַת יוֹנָה וְהִנֵּה יֶשׁ-פֹּה גָּדוֹל מִיוֹנָה׃

אור הגוף

(מתי ה' 16-15;ו' 23-22)

33 אֵין מַדְלִיק-נֵר לָשׂוּם בַּסֵּתֶר אוֹ-תַחַת הָאֵיפָה כִּי יְשִׂמֵהוּ עַל הַמְּנוֹרָה לְמַעַן יִרְאוּ בָּאֵי הַבַּיִת אֶת-אוֹרוֹ׃ 34 נֵר הַגּוּף הוּא הָעָיִן לָכֵן עֵינְךָ כִּי-תִהְיֶה תְמִימָה גַּם כָּל-גּוּפְךָ יֵאוֹר וּבִהְיוֹתָהּ רָעָה וְחָשַׁךְ גַּם-גּוּפֶךָ׃ 35 עַל-כֵּן הִשָּׁמֶר-לָךְ פֶּן-יֶחְשַׁךְ הָאוֹר אֲשֶׁר בְּקִרְבֶּךָ׃ 36 וְהִנֵּה אִם-גּוּפְךָ כֻּלּוֹ אוֹר וְאֵין בּוֹ כָּל-דְּבַר-חשֶׁךְ אָז יֵאוֹר כֻּלּוֹ כְּאִלּוּ יָאִיר לְךָ הַנֵּר בִּבְרַק נָגְהוֹ׃

דברי תוכחה על הפרושים ובעלי התורה

(פרק כ' 47-45;מתי כג' 36-1;מרקוס יב' 40-38)

37 וַיְהִי בְדַבְּרוֹ וַיְבַקֵּשׁ מִמֶּנּוּ פָּרוּשׁ אֶחָד לֶאֱכֹל אִתּוֹ לָחֶם וַיָּבֹא הַבַּיְתָה וַיַּסֵּב׃ 38 וַיַּרְא הַפָּרוּשׁ וַיִּתְמַהּ אֲשֶׁר לֹא-נָטַל יָדָיו רִאשׁוֹנָה לִפְנֵי הַסְּעוּדָה׃ 39 וַיֹּאמֶר אֵלָיו הָאָדוֹן הֵן עַתָּה הַפְּרוּשִׁים מְטַהֲרִים אַתֶּם אֶת-הַכּוֹס וְהַקְּעָרָה מִחוּץ וְקִרְבְּכֶם מָלֵא גָּזֵל וָרָשַׁע׃ 40 הַכְּסִילִים הֲלֹא עֹשֵׂה חוּצוֹ שֶׁל דָּבָר גַּם-עָשָׂה אֶת-תּוֹכוֹ׃ 41 אֲבָל-תְּנוּ לִצְדָקָה אֵת אֲשֶׁר-בָּם וְהִנֵּה הַכֹּל טָהוֹר לָכֶם׃ 42 אוֹי לָכֶם הַפְּרוּשִׁים הַמְעַשְּׂרִים אֶת-הַמִּנְתָּא וְאֶת-הַפִּיגַם וְאֵת כָּל-הַיָּרָק (ויקרא כז' ל') וּמַנִּיחִים אֶת-הַמִּשְׁפָּט וְאֵת אַהֲבַת אֱלֹהִים וַעֲלֵיכֶם לַעֲשׂוֹת אֶת-אֵלֶּה וְלֹא לְהַנִּיחַ גַּם אֶת-אֵלֶּה׃(זכריה ז' ט') 43 אוֹי לָכֶם הַפְּרוּשִׁים כִּי תְאֵהֲבוּ לָשֶׁבֶת רִאשֹׁנִים בְּבָתֵּי כְנֵסִיּוֹת וְשֶׁיִּשְׁאֲלוּ בִשְׁלוֹמְכֶם בַּשְּׁוָקִים׃ 44 אוֹי לָכֶם [הַסּוֹפְרִים וְהַפְּרוּשִׁים הַחֲנֵפִים] כִּי אַתֶּם כַּקְּבָרִים אֲשֶׁר אֵינָם נִכָּרִים וּבְנֵי הָאָדָם מִתְהַלְּכִים עֲלֵיהֶם וְלֹא יָדָעוּ׃ 45 וַיַּעַן אֶחָד מֵחַכְמֵי הַתּוֹרָה וַיֹּאמֶר אֵלָיו רַבִּי בִּדְבָרֶיךָ אֵלֶּה תֵּחָרֵף גַּם-אֹתָנוּ׃ 46 וַיֹּאמֶר אוֹי לָכֶם חַכְמֵי הַתּוֹרָה גַּם אַתֶּם כִּי עֹמְסִים אַתֶּם עַל-בְּנֵי הָאָדָם מַשָּׂאוֹת כְּבֵדִים מִסְּבֹל וְאַתֶּם בְּעַצְמְכֶם אֵינְכֶם נֹגְעִים בַּמַּשָּׂאוֹת גַּם-בְּאַחַת מֵאֶצְבְּעוֹתֵיכֶם׃(מלאכי ב' ז'-ח') 47 אוֹי לָכֶם כִּי-בוֹנִים אַתֶּם נְפָשׁוֹת עַל-קִבְרוֹת הַנְּבִיאִים וַאֲבוֹתֵיכֶם הָרְגוּ אוֹתָם׃ 48 וּבְכֵן עֵדִים אַתֶּם וְרוֹצִים בְּמַעֲשֵׂי אֲבוֹתֵיכֶם כִּי הֵמָּה הָרְגוּ אוֹתָם וְאַתֶּם בּוֹנִים אֶת-קִבְרֵיהֶם׃ 49 בַּעֲבוּר זֹאת גַּם-אָמְרָה חָכְמַת הָאֱלֹהִים אֶשְׁלַח אֲלֵיהֶם נְבִיאִים וּשְׁלִיחִים וּמֵהֶם יַהַרְגוּ וְיִרְדֹּפוּ׃ 50 לְמַעַן יִדָּרֵשׁ מִן-הַדּוֹר הַזֶּה דַּם כָּל-הַנְּבִיאִים אֲשֶׁר נִשְׁפַּךְ לְמִן-הִוָּסֵד הָאָרֶץ׃ 51 מִדַּם-הֶבֶל (בראשית ד' ח') עַד-דַּם זְכַרְיָהוּ אֲשֶׁר נֶהֱרַג בֵּין הַמִּזְבֵּחַ וְלַבָּיִת (דברי הימים ב', כד' כ'-כב') אָכֵן אֹמֵר אֲנִי לָכֶם דָּרוֹשׁ יִדָּרֵשׁ מִן-הַדּוֹר הַזֶּה׃ 52 אוֹי לָכֶם חַכְמֵי הַתּוֹרָה כִּי-הֲסִירֹתֶם אֶת-מַפְתֵּח הַדָּעַת אַתֶּם לֹא-בָאתֶם וְאֶת-הַבָּאִים מְנַעְתֶּם׃(***) 53 וַיְהִי כְּדַבְּרוֹ לָהֶם אֶת-הַדְּבָרִים הָאֵלֶּה וַיָּחֵלּוּ הַסּוֹפְרִים וְהַפְּרוּשִׁים לִצְרֹר אוֹתוֹ מְאֹד וּלְהַקְשׁוֹת לוֹ דְּבָרִים הַרְבֵּה׃ 54 וַיֶּאֶרְבוּ לוֹ לִלְכֹּד דָּבָר מִפִּיהוּ לְמַעַן יִמְצְאוּ עָלָיו עֲלִילֹת דְּבָרִים׃