הבשורה על-פי מתי
פרק כו

מזימה נגד ישוע

(מרקוס יד' 2-1;לוקס כב' 2-1;יוחנן יא' 53-45)

1 וַיְהִי כְּכַלּוֹת יֵשׁוּעַ לְדַבֵּר אֵת כָּל-הַדְּבָרִים הָאֵלֶּה וַיֹּאמֶר אֶל-תַּלְמִידָיו׃ 2 אַתֶּם יְדַעְתֶּם כִּי עוֹד יוֹמַיִם וְהַפֶּסַח בָּא וּבֶן-הָאָדָם יִמָּסֵר לְהִצָּלֵב׃ 3 וַיִּקָּהֲלוּ רָאשֵׁי הַכֹּהֲנִים וְהַסּוֹפְרִים וְזִקְנֵי הָעָם אֶל-חֲצַר הַכֹּהֵן הַגָּדוֹל וּשְׁמוֹ קַיָּפָא׃ 4 וַיִּוָּעֲצוּ יַחְדָּו לִתְפֹּשׂ אֶת-יֵשׁוּעַ בְּעָרְמָה וְלַהֲמִיתוֹ׃(תהילים לא' יד') 5 וַיֹּאמְרוּ אַךְ-לֹא בֶחָג פֶּן-תִּהְיֶה מְהוּמָה בָּעָם׃

המשיחה בבית עניה

(מרקוס יד' 9-3;יוחנן יב' 8-1)

6 וַיְהִי בִּהְיוֹת יֵשׁוּעַ בֵּית הִינִי בְּבֵית שִׁמְעוֹן הַמְּצֹרָע׃ 7 וַתִּקְרַב אֵלָיו אִשָׁה וּבְיָדָהּ פַּךְ מִרְקַחַת יְקָרָה מְאֹד וַתִּצֹּק עַל-רֹאשׁוֹ בַּהֲסִיבּוֹ לֶאֱכֹל׃ 8 וַיִּרְאוּ הַתַּלְמִידִים וַיִכְעֲסוּ וַיֹּאמְרוּ עַל-מָה הָאִבּוּד הַזֶּה׃ 9 כִּי הַמִּרְקַחַת הַזֹּאת הָיְתָה רְאוּיָה לְהִמָּכֵר בִּמְחִיר רָב וְלָתֵת לָעֲנִיִּים׃ 10 וַיֵּדַע יֵשׁוּעַ וַיֹּאמֶר אֲלֵיהֶם לָמָּה תַּלְאוּ אֶת-הָאִשָׁה הֲלֹא מַעֲשֶׂה טוֹב עָשְׂתָה עִמָּדִי׃ 11 כִּי הָעֲנִיִּים בְּכָל-עֵת אִתְּכֶם וְאָנֹכִי אֵינֶנִּי בְּקִרְבְּכֶם בְּכָל-עֵת׃(דברים טו' יא') 12 כִּי אֲשֶׁר שָׁפְכָה אֶת-הַמִּרְקַחַת הַזֹּאת עַל-גּוּפִי לַחֲנֹט אוֹתִי עָשְׂתָה זֹּאת׃ 13 אָמֵן אֹמֵר אֲנִי לָכֶם בְּכָל-מָקוֹם אֲשֶׁר תִּקָּרֵא הַבְּשׂוֹרָה הַזֹּאת בְּכָל-הָעוֹלָם גַּם אֶת-אֲשֶׁר עָשְׂתָה הִיא יְסֻפַּר לְזִכָּרוֹן לָהּ׃ 14 וַיֵּלֶךְ אֶחָד מִשְׁנֵים הֶעָשָׂר וּשְׁמוֹ יְהוּדָה אִישׁ-קְרִיּוֹת אֶל-רָאשֵׁי הַכֹּהֲנִים׃ 15 וַיֹּאמֶר מָה-תִּתְּנוּ לִי וְאֶמְסְרֶנּוּ בְיֶדְכֶם וַיִּשְׁקְלוּ-לוֹ שְׁלֹשִׁים כָּסֶף׃(זכריה יא' יב') 16 וּמִן-הָעֵת הַהִיא בִּקֵּשׁ תֹּאֲנָה לִמְסֹר אוֹתוֹ׃

סעודת הפסח

(מרקוס יד' 26-12;לוקס כב' 23-7;יוחנן יג' 30-21)

17 וַיְהִי בָרִאשׁוֹן לְחַג הַמַּצּוֹת וַיִּגְּשׁוּ הַתַּלְמִידִים אֶל-יֵשׁוּעַ לֵאמֹר אֵיפֹה נָכִין לְךָ לֶאֱכֹל אֶת-הַפָּסַח׃(שמות יב' יח') 18 וַיֹּאמֶר לְכוּ הָעִירָה אֶל-פְּלֹנִי אַלְמֹנִי וַאֲמַרְתֶּם אֵלָיו כֹּה אָמַר רַבֵּנוּ עִתִּי קְרוֹבָה וּבְבֵיתְךָ אֶעֱשֶׂה אֶת-הַפֶּסַח עִם-תַּלְמִידָי׃ 19 וְיַּעֲשׂוּ הַתַּלְמִידִים כַּאֲשֶׁר צִּוָם יֵשׁוּעַ וַיָּכִינוּ אֶת-הַפָּסַח׃ 20 וַיְהִי בָעֶרֶב וַיַּסֵּב עִם-שְׁנֵים הֶעָשָׂר׃ 21 וּבְאָכְלָם וַיֹּאמַר אָמֵן אֹמֵר אֲנִי לָכֶם אֶחָד מִכֶּם יִמְסְרֵנִי׃ 22 וַיִּתְעַצְּבוּ מְאֹד וַיָּחֵלּוּ אִישׁ אִישׁ לֵאמֹר לוֹ הֶאָנֹכִי הוּא אֲדֹנִי׃ 23 וַיַּעַן וַיֹּאמֶר הָאִישׁ אֲשֶׁר טָבַל עִמִּי אֶת-יָדוֹ בַּקְּעָרָה הוּא יִמְסְרֵנִי׃ 24 הֵן בֶּן-הָאָדָם הַלוֹךְ יֵלֵךְ כַּכָּתוּב עָלָיו וְאוֹי לָאִישׁ אֲשֶׁר עַל-יָדוֹ יִמָּסֵר בֶּן-הָאָדָם טוֹב לָאִישׁ הַהוּא שֶׁלּא נוֹלָד׃ 25 וַיַּעַן יְהוּדָה הַמֹּסֵר אוֹתוֹ וַיֹּאמַר רַבִּי הַאֲנִי הוּא וַיֹּאמֶר אֵלָיו אַתָּה אָמָרְתָּ׃ 26 וַיְהִי בְּאָכְלָם וַיִּקַּח יֵשׁוּעַ אֶת-הַלֶּחֶם וַיְבָרֶךְ וַיִּפְרֹס וַיִּתֵּן לַתַּלְמִידִים וַיֹּאמַר קְחוּ וְאִכְלוּ זֶה הוּא גּוּפִי׃ 27 וַיִּקַּח אֶת-הַכּוֹס וַיְבָרֶךְ וַיִּתֵּן לָהֶם וַיֹּאמַר שְׁתוּ מִמֶּנָּה כֻּלְּכֶם׃ 28 כִּי זֶה הוּא דָּמִי דַּם-הַבְּרִית הַחֲדָשָׁה (שמות כד' ח'; ירמיהו לא' לא') הַנִּשְׁפָּךְ בְּעַד רַבִּים לִסְלִיחַת חֲטָאִים׃ 29 וַאֲנִי אֹמֵר לָכֶם לֹא אֶשְׁתֶּה מֵעַתָּה מִפְּרִי הַגֶּפֶן הַזֶּה עַד הַיּוֹם הַהוּא אֲשֶׁר אֶשְׁתֶּה אֹתוֹ עִמָּכֶם וְהוּא חָדָשׁ בְּמַלְכוּת אָבִי׃

כיפא עתיד להתכחש לישוע

(מרקוס יד' 31-26;לוקס כב' 34-31;יוחנן יג' 36, 38)

30 וַיְהִי אַחֲרֵי קָרְאָם אֶת-הַהַלֵּל וַיֵּצְאוּ אֶל-הַר הַזֵּיתִים׃ 31 אָז אָמַר אֲלֵיהֶם יֵשׁוּעַ אַתֶּם כֻּלְּכֶם תִּכָּשְׁלוּ בִי הַלָּיְלָה כִּי כָתוּב אַכֶּה אֶת-הָרֹעֶה וּתְפוּצֶיןָ הַצֹּאן׃(זכריה יג' ז') 32 וְאַחֲרֵי קוּמִי אֵלֵךְ לִפְנֵיכֶם הַגָּלִילָה׃ 33 וַיַּעַן פֶּטְרוֹס וַיֹּאמֶר לוֹ גַּם כִּי-יִכָּשְׁלוּ בְךָ כֻּלָּם אֲנִי לֹא אֶכָּשֵׁל לְעוֹלָם׃ 34 וַיֹּאמֶר אֵלָיו יֵשׁוּעַ אָמֵן אֹמֵר אֲנִי לְךָ כִּי בַלַּיְלָה הַזֶּה בְּטֶרֶם יִקְרָא הַתַּרְנְגוֹל תְּכַחֵשׁ בִּי שָׁלֹשׁ פְּעָמִים׃ 35 וַיֹּאמֶר אֵלָיו פֶּטְרוֹס גַּם אִם עָלַי לָמוּת אִתְּךָ לֹא אֲכַחֵשׁ בָּךְ וְכֵן אָמְרוּ גַּם כָּל-הַתַּלְמִידִים׃

ישוע בגת שמנים

(מרקוס יד' 42-32;לוקס כב' 46-39)

36 אַחֲרֵי-כֵן בָּא אִתָּם יֵשׁוּעַ אֶל-חָצֵר הַנִּקְרָא גַּת-שְׁמָנֵי וַיֹּאמֶר אֶל-הַתַּלְמִידִים שְׁבוּ לָכֶם פֹּה עַד-אֲשֶׁר אֵלֵךְ שָׁמָּה וְהִתְפַּלָּלְתִּי׃ 37 וַיִּקַּח אִתּוֹ אֶת-פֶּטְרוֹס וְאֶת-שְׁנֵי בְּנֵי זַבְדָּי וַיָּחֶל לְהֵעָצֵב וְלָמוּג׃ 38 וַיֹּאמֶר לָהֶם נַפְשִׁי מָרָה-לִי עַד-מָוֶת (תהילים פח' ד') עִמְדוּ פֹה וְשִׁקְדוּ עִמִּי׃ 39 וַיֵּלֶךְ מְעַט מֵאִתָּם וַיִּפֹּל עַל-פָּנָיו וַיִּתְפַּלֵּל לֵאמֹר אָבִי אִם-יוּכַל לִהְיוֹת תַּעֲבָר-נָא מֵעָלַי הַכּוֹס הַזֹּאת אַךְ לֹא כִרְצוֹנִי כִּי אִם-כִּרְצוֹנֶךָ׃ 40 וַיָּבֹא אֶל-הַתַּלְמִידִים וַיִּמְצָאֵם יְשֵׁנִים וַיֹּאמֶר אֶל-פֶּטְרוֹס הִנֵּה לֹא-הָיָה בִיכָלְתְּכֶם לִשְׁקֹד עִמִּי שָׁעָה אֶחַת׃(תהילים סט' כא') 41 שִׁקְדוּ וְהִתְפַּלְּלוּ פֶּן-תָּבֹאוּ לִידֵי נִסָּיוֹן הֵן הָרוּחַ חֲפֵצָה וְהַבָּשָׂר רָפֶה׃ 42 וַיּוֹסֶף לָלֶכֶת-לוֹ שֵׁנִית וַיִּתְפַּלֵּל לֵאמֹר אָבִי אִם-לֹא תוּכַל הַכּוֹס הַזֹּאת לַעֲבֹר מֵעָלַי בִּלְתִּי אִם אֶשְׁתֶּה אֹתָהּ יְהִי כִּרְצוֹנֶךָ׃ 43 וַיָּבֹא וַיִּמְצָאֵם גַּם בַּפַּעַם הַזֹּאת יְשֵׁנִים כִּי עֵינֵיהֶם כְּבֵדוֹת׃ 44 וַיַּנִּיחֵם וַיּוֹסֶף לָלֶכֶת וַיִּתְפַּלֵּל שְׁלִישִׁית בְּאָמְרוֹ עוֹד-הַפַּעַם כַּדָּבָר הַזֶּה׃ 45 וַיָּבֹא אֶל-הַתַּלְמִידִים וַיֹּאמֶר אֲלֵיהֶם נוּמוּ עוֹד וְנוּחוּ הִנֵּה הַשָׁעָה קְרוֹבָה וּבֶן-הָאָדָם נִמְסָר בִּידֵי חַטָּאִים׃ 46 קוּמוּ וְנֵלֵכָה הִנֵּה הַמֹּסֵר אוֹתִי הֹלֵךְ וְקָרֵב׃(תהילים קיט' קנ')

ישוע נעצר

(מרקוס יד' 50-43;לוקס כב' 53-47;יוחנן יח' 12-3)

47 עוֹדֶנּוּ מְדַבֵּר וְהִנֵּה יְהוּדָה אֶחָד מִשְׁנֵים הֶעָשָׂר בָּא וְעִמּוֹ הָמוֹן רָב בַּחֲרָבוֹת וּבְמַקְלוֹת מֵאֵת רָאשֵׁי הַכֹּהֲנִים וְזִקְנֵי הָעָם׃ 48 וְהַמֹּסֵר אֹתוֹ נָתַן לָהֶם אוֹת לֵאמֹר הָאִישׁ אֲשֶׁר אֶשָׁקֵהוּ זֶה הוּא תִּפְשׂוּהוּ׃ 49 וּמִיָּד נִגַּשׁ אֶל-יֵשׁוּעַ וַיֹּאמֶר שָׁלוֹם לְךָ רַבִּי וַיְנַשֶׁק-לוֹ׃(תהילים נה' כב') 50 וַיֹּאמֶר אֵלָיו יֵשׁוּעַ רֵעִי עַל-מֶה בָאתָ וַיִּגְּשׁוּ וַיִּשְׁלְחוּ אֶת-יְדֵיהֶם בְּיֵשׁוּעַ וַיִּתְפְּשׂוּ אֹתוֹ׃ 51 וְהִנֵּה אֶחָד מִן-הָאֲנָשִׁים אֲשֶׁר עִם-יֵשׁוּעַ שָׁלַח יָדוֹ וַיִּשְׁלֹף חַרְבּוֹ וַיַּךְ אֶת-עֶבֶד הַכֹּהֵן הַגָּדוֹל וַיְקַצֵּץ אֶת-אָזְנוֹ׃ 52 וַיֹּאמֶר אֵלָיו יֵשׁוּעַ הָשֵׁב אֶת-חַרְבְּךָ אֶל-תַּעְרָהּ כִּי כָּל-אֹחֲזֵי חֶרֶב בַּחֶרֶב יֹאבֵדוּ׃(בראשית ט' ו') 53 הֲתֹאמַר בְּלִבְּךָ כִּי לֹא יָכֹלְתִּי לִשְׁאֹל עַתָּה מֵאֵת אָבִי וִיצַוֶּה-לִי יוֹתֵר מִשְׁנֵים עָשָׂר לִגְיוֹנוֹת שֶׁל-מַלְאָכִים׃ 54 וְאֵיכָכָה אֵפוֹא יִמָּלְאוּ הַכְּתוּבִים כִּי-כֵן הָיֹה תִהְיֶה׃ 55 בַּשָׁעָה הַהִיא אָמַר יֵשׁוּעַ אֶל-הֲמוֹן הָעָם כְּצֵאת עַל-פָּרִיץ יְצָאתֶם בַּחֲרָבוֹת וּבְמַקְלוֹת לְתָפְשֵׂנִי וַאֲנִי הָיִיתִי יֹשֵׁב וּמְלַמֵּד בַּמִּקְדָּשׁ יוֹם יוֹם וְלֹא הֶחֱזַקְתֶּם בִּי׃ 56 וְכָל-זֹאת הָיְתָה לְמַלּאת כִּתְבֵי הַנְּבִיאִים אָז עֲזָבוּהוּ הַתַּלְמִידִים כֻּלָּם וַיָּנוּסוּ׃(תהילים לח' יב'; זכריה יג' ז')

ישוע לפני הסנהדרין

(מרקוס יד' 65-53;לוקס כב' 55-54, 71-63;יוחנן יח' 14-13, 24-19)

57 וְהָאֲנָשִׁים אֲשֶׁר תָּפְשׂוּ אֶת-יֵשׁוּעַ הוֹלִיכֻהוּ אֶל-קַיָּפָא הַכֹּהֵן הַגָּדוֹל אֲשֶׁר נִקְהֲלוּ בְּבֵיתוֹ הַסּוֹפְרִים וְהַזְּקֵנִים׃ 58 וּפֶטְרוֹס הֹלֵךְ אַחֲרָיו מֵרָחוֹק עַד לַחֲצַר הַכֹּהֵן הַגָּדוֹל וַיָּבֹא פְנִימָה וַיֵּשֶׁב אֵצֶל הַמְשָׁרֲתִים לִרְאוֹת מַה-יִּהְיֶה אַחֲרִית הַדָּבָר׃ 59 וְרָאשֵׁי הַכֹּהֲנִים וְהַסּוֹפְרִים וְכָל-הַסַּנְהֶדְרִין בִּקְשׁוּ עֵדוּת שֶׁקֶר בְּיֵשׁוּעַ לַהֲמִיתוֹ וְלֹא מָצָאוּ׃ 60 וְאַף כִּי בָאוּ שָׁמָּה עֵדֵי שֶׁקֶר רַבִּים לֹא מָצָאוּ׃(תהילים כז' יב'; דברים יט' טו') 61 וּבָאַחֲרוֹנָה נִגְּשׁוּ שְׁנֵי עֵדֵי שֶׁקֶר וַיֹּאמְרוּ זֶה אָמַר יֵשׁ לְאֵל יָדִי לַהֲרֹס אֶת-הֵיכַל הָאֱלֹהִים וְלִבְנוֹתוֹ בִּשְׁלֹשֶׁת יָמִים׃ 62 וַיָּקָם הַכֹּהֵן הַגָּדוֹל וַיֹּאמֶר אֵלָיו הֲלֹא תַעֲנֶה דָּבָר מַה-זֶּה יָעִידוּ-בְךָ הָאֲנָשִׁים הָאֵלֶּה׃(תהילים לח' יד'-טו'; ישעיהו נג' ז') 63 וְיֵשׁוּעַ הֶחֱרִישׁ וַיַּעַן הַכֹּהֵן הַגָּדוֹל וַיֹּאמֶר לוֹ מַשְׁבִּיעֲךָ אֲנִי בֵּאלֹהִים חַיִּים שֶׁתֹּאמַר לָנוּ אִם-אַתָּה הַמָּשִׁיחַ בֶּן-הָאֱלֹהִים׃ 64 וַיֹּאמֶר אֵלָיו יֵשׁוּעַ אַתָּה אָמָרְתָּ וַאֲנִי אֹמֵר לָכֶם מֵעַתָּה תִּרְאוּ אֶת-בֶּן-הָאָדָם יֹשֵׁב לִימִין הַגְּבוּרָה וּבָא עִם-עַנְנֵי הַשָּׁמָיִם׃(דניאל ז' יג'-יד') 65 וַיִּקְרַע הַכֹּהֵן הַגָּדוֹל אֶת-בְּגָדָיו וַיֹּאמַר מְגַדֵּף הוּא וּמַה-לָּנוּ עוֹד לְבַקֵּשׁ עֵדִים הֲלֹא עַתָּה שְׁמַעְתֶּם אֶת-גִּדּוּפוֹ׃ 66 מַה-דַּעְתְּכֶם וַיַּעֲנוּ וַיֹּאמְרוּ אִישׁ-מָוֶת הוּא׃ 67 וַיָּרֹקּוּ בְּפָנָיו וַיַּכֻּהוּ בְאֶגְרוֹף וַאֲחֵרִים הִכֻּהוּ עַל-הַלֶּחִי׃(ישעיהו נ' ו'; נג' ז') 68 וַיֹּאמְרוּ הִנָּבֵא לָנוּ הַמָּשִׁיחַ מִי הוּא הַמַּכֶּה אוֹתָךְ׃

כיפא מתכחש לישוע

(מרקוס יד' 72-66;לוקס כב' 62-55;יוחנן יח' 27-25)

69 וּפֶטְרוֹס יָשַׁב מִחוּץ לַבַּיִת בֶּחָצֵר וַתִּגַּשׁ אֵלָיו שִׁפְחָה אַחַת לֵאמֹר גַּם-אַתָּה הָיִיתָ עִם-יֵשׁוּעַ הַגָּלִילִי׃ 70 וַיְכַחֵשׁ בִּפְנֵי כֻלָּם לֵאמֹר לֹא יָדַעְתִּי מָה-אַתְּ אֹמָרֶת׃ 71 וַיַּעֲבֹר אֶל-פֶּתַח הַשַׁעַר וַתֵּרֶא אוֹתוֹ אַחֶרֶת וַתֹּאמֶר לָאֲנָשִׁים אֲשֶׁר-שָׁם גַּם-זֶה הָיָה עִם-יֵשׁוּעַ הַנָּצְרִי׃ 72 וַיּוֹסֶף לְכַחֵשׁ וַיִּשָׁבַע לֵאמֹר לֹא יָדַעְתִּי אֶת-הָאִישׁ׃ 73 וּמְעַט אַחֲרֵי-כֵן וַיִּגְּשׁוּ הָעֹמְדִים שָׁם וַיֹּאמְרוּ אֶל-פֶּטְרוֹס אֲבָל גַּם-אַתָּה מֵהֶם כִּי גַם-לְשׁוֹנְךָ מְגַלָּה אוֹתָךְ׃ 74 וַיָּחֶל לְהַחֲרִים אֶת-נַפְשׁוֹ וּלְהִשָׁבֵע לֵאמֹר לֹא יָדַעְתִּי אֶת-הָאִישׁ וּמִיָּד קָרָא הַתַּרְנְגוֹל׃ 75 וַיִּזְכֹּר פֶּטְרוֹס אֶת-דְּבַר יֵשׁוּעַ אֲשֶׁר דִּבֶּר אֵלָיו לֵאמֹר בְּטֶרֶם יִקְרָא הַתַּרְנְגוֹל תְּכַחֵשׁ בִּי שָׁלֹשׁ פְּעָמִים וַיֵּצֵא הַחוּצָה וַיְמָרֵר בַּבֶּכִי׃